रौतहटस्थित फतुवा विजयपुर नगरपालिकामा डेंगु र लामखुट्टे नियन्त्रणमा गम्भीर लापरबाही देखिएको भन्दै स्थानीयवासी आक्रोशित बनेका छन्। पछिल्लो समय डेंगु संक्रमणको जोखिम बढ्दै जाँदा पनि प्रभावकारी नियन्त्रणका कार्यक्रम सञ्चालन हुन नसकेको गुनासो बढ्दो छ।
स्थानीयका अनुसार नगरपालिकाले समयमै औषधि छर्कने, सरसफाइ अभियान सञ्चालन गर्ने तथा जनचेतना फैलाउने जस्ता आवश्यक कदम चाल्न नसक्दा समस्या झन् जटिल बन्दै गएको छ। लामखुट्टेको अत्यधिक वृद्धि भए पनि सम्बन्धित निकाय मौन बसेको आरोप छ।
यस विषयमा नगर प्रमुख अम्बेया खातुनमाथि पनि गम्भीर प्रश्न उठ्न थालेका छन्। जनस्वास्थ्य जस्तो संवेदनशील विषयमा समेत चासो नदिएको भन्दै उनको नेतृत्वप्रति असन्तुष्टि बढ्दै गएको देखिन्छ।
डेंगु नियन्त्रणमा ढिलाइ हुँदा सर्वसाधारणको ज्यान जोखिममा पर्ने खतरा बढेको छ। स्थानीयले तत्काल प्रभावकारी योजना ल्याई नियन्त्रण अभियान सञ्चालन गर्न माग गरेका छन्।
