रौतहट–३ बाट प्रतिनिधि सभा सदस्य पदकी उम्मेदवार तथा नेपाली कम्युनिष्ट पार्टीकी नेतृ पुनम यादवले महिला, किसान र युवाको भविष्य सुनिश्चित नगरी देश वा क्षेत्रको समृद्धि सम्भव नहुने स्पष्ट बताउनुभएको छ।
आज बिहीबार गुजरा नगरपालिकामा सम्पन्न नगर भेलालाई सम्बोधन गर्दै यादवले भनिन्, “महिला, किसान र युवालाई केवल भाषणमा होइन, नीति र कार्यक्रममा प्राथमिकतामा राख्न सके मात्र वास्तविक विकास सम्भव हुन्छ।”
उनले महिलालाई कमजोर ठान्ने सोच अझै समाजमा विद्यमान रहेको उल्लेख गर्दै महिलाको सशक्तिकरण बिना समावेशी विकास सम्भव नहुने बताइन्। “महिला घर–परिवार र समाज दुवैको मेरुदण्ड हुन्, उनीहरूको अधिकार र अवसर सुनिश्चित नगरी समृद्धिको कल्पना भ्रम मात्र हो,” उनको भनाइ थियो।
यस्तै, किसानको समस्या समाधान नगरी ग्रामीण अर्थतन्त्र बलियो नबन्ने उल्लेख गर्दै यादवले उत्पादन, बजार र उचित मूल्य सुनिश्चित गर्न राज्यको सक्रिय भूमिका आवश्यक रहेको बताइन्। युवालाई रोजगारीका लागि विदेशिन बाध्य बनाउने अवस्थाको अन्त्य गर्दै स्वदेशमै अवसर सिर्जना गर्नुपर्नेमा उनले जोड दिइन्।
नगर भेलामा उपस्थित पार्टी नेता, कार्यकर्ता तथा स्थानीय नागरिकहरूलाई सम्बोधन गर्दै यादवले आफू निर्वाचित भएमा रौतहट–३ लाई रोजगारी, स्वास्थ्य, शिक्षा र कृषि केन्द्रित विकासको नमुना क्षेत्र बनाउने प्रतिबद्धता व्यक्त गरिन्।
उनको भनाइमा, “राजनीति व्यक्तिगत लाभका लागि होइन, जनताको भविष्य सुरक्षित गर्ने माध्यम हुनुपर्छ।” गुजरा नगरपालिकामा सम्पन्न उक्त नगर भेलाले स्थानीयस्तरमा चुनावी माहोल थप उत्साहित बनाएको सहभागीहरूको प्रतिक्रिया थियो।
