महिला नेतृ पुनम यादवले दलीय राजनीतिबाट तत्कालका लागि विदा लिने घोषणा गरेकी छन्। उनले आफ्नो आधिकारिक फेसबुक पोस्टमार्फत उक्त निर्णय सार्वजनिक गरेकी हुन्।
यादवले आफ्नो निर्णय कुनै निराशा, हताशा वा हतारमा नभई गहिरो सोच–विचार र आत्ममूल्याङ्कनपछि लिइएको स्पष्ट पारेकी छन्। उनले नेपाली कम्युनिष्ट पार्टीमा १० वर्षभन्दा बढी समय इमान्दारिता र सक्रियताका साथ बिताएको उल्लेख गर्दै अब उक्त राजनीतिक यात्रालाई यहीँबाट टुंग्याउने निर्णय गरेको बताइन्।
उनका अनुसार अबका दिनमा उनी कुनै पनि राजनीतिक दल वा समूहसँग आबद्ध नहुने र स्वतन्त्र रूपमा सामाजिक, नागरिक तथा जनसरोकारका विषयमा सक्रिय रहनेछिन्।
राजनीतिक यात्राका क्रममा साथ, सहयोग, माया र विश्वास प्रदान गर्ने सम्पूर्ण समर्थक तथा शुभेच्छुकहरूप्रति उनले आभार व्यक्त गरेकी छन्। साथै हालै सम्पन्न प्रतिनिधि सभा निर्वाचनमा रौतहट–३ बाट आफूलाई मत दिने सम्पूर्ण मतदाताप्रति उनले विशेष धन्यवाद दिएकी छन्।
उनले आफ्नो सन्देशको अन्त्यमा “तपाईंहरू सबैको जय होस्, नेपालको जय होस्!” भन्दै देश र जनताप्रति आफ्नो प्रतिबद्धता पुनः दोहोर्याएकी छन्।
उनको यो घोषणाले सामाजिक सञ्जालमा व्यापक चर्चा पाएको छ भने स्थानीय तथा राष्ट्रिय राजनीतिमा पनि नयाँ बहस सुरु हुने संकेत देखिएको छ।
